阿嫲被姦殺後（下）
上集：https://bit.ly/2Dd3ihd
屋企人都勸細佬放棄，連「受害者聯盟」嘅家屬都陸續退出，或者自然死亡。
我同細佬講：「三十年啦，就算阿嫲當年冇遇到嗰件事，佢依加都唔喺度啦。」
「正義唔可以用時間計算。」細佬眼神堅定：「就算阿嫲聽日就會死，今晚有人殺咗佢，都係謀殺，冇人可以咁樣剝奪另一個人嘅生命。」
細佬嘅堅持，終於得到答案。
阿嫲死後三十三年，研究院從犯罪資料庫中，搵到一個叫李春嘅56歲男人，同當日凶手留低嘅DNA係一致嘅。
搵到凶手，就應該懲治，但世事遠遠冇咁簡單。
根據當年嘅法律，刑事追訴期只有十五年，連環殺人案嘅最後一宗案件，都已經過去咗廿幾年。
雖然後來刑事追訴期嘅法律有所修改，但時間上，都唔可以追訴番呢單案。
換句話講，我哋搵到凶手，但我哋冇辦法起訴凶手。
「家姐，我會聯合其他受害者家屬，搞大件事，一定要起訴李春。」細佬咬牙切齒：「唔可以畀佢逍遙法外。」
我提醒細佬：「但係李春冇逍遙法外。」
假如李春當年逃過法網，之後過住幸福快樂嘅生活，我當然睇唔過眼，點都要令佢得到應有嘅懲罰。
但係，廿幾年前，李春因姦殺老婆個妹而入獄，判處終身監禁，依加仲坐緊監。
只係當年嘅鑑證科技冇咁先進，冇人知道，李春係之前連環殺人案嘅凶手。
即係話，即使我哋搞咗一大輪，成功起訴李春，並且罪名成立，李春都只會係終身監禁，分分鐘連監倉都唔駛換。
唔止勞民傷財，仲會再次揭起我哋嘅傷疤，所有朋友都會知我阿嫲係被姦殺，而李春嘅情況冇任何改變。
何必呢？
細佬強調：「唔一樣，依加係李春係因為姦殺妻妹而坐監，而唔係因為連環殺人案，唔係因為阿嫲嘅死。」
「咁又點啫？最高刑罰就係終身監禁，一個人得一個『終身』㗎啫。」我反駁。
細佬答：「係責任。佢要承擔番每一條人命嘅責任。」
我嗤之以鼻：「李春喪心病狂，殺咗咁多人，你唔係諗住起訴咗佢，佢就會良心發現，下半世生活喺愧疚中掛？」
「正義，就係每一個做錯事嘅人，都為每一件錯事，得到應有嘅懲罰。」細佬語氣堅定。
不過，企喺細佬嗰邊嘅人，唔係好多。
有幾個家屬一直以嚟，都留喺「受害者聯盟」，堅持緝凶。
但當凶手嘅身份被發現，佢哋知道凶手已經判處終身監禁，佢哋都鬆咗一口氣。
只有細佬四方奔走，想搵到途徑起訴李春。
正義，到底更重要嘅，係過程定係現實嘅改變？
如果再多嘅奮鬥，都唔會改變現實，咁仲應唔應該追求正義嘅過程？
—完—
真人真事改編自「華城連環殺人案」，在1986年至1991年間，韓國華城郡附近村莊發生了十宗姦殺案，受害者年齡由13歲至71歲不等。
2006年，最後一宗案件的15年刑事追訴期結束，即使找到兇手，也不能在法律上起訴。
2019年，案情產生重大突破，李春在與某幾宗案件的兇手的DNA一致，李春在自1994年起，已因姦殺妻妹在獄中服刑。
雖然法律追訴期已過，但警方依然重新啟動調查，公布了李春在的名字和照片。
結果，李春在承認犯下「華城連環殺人案」中的九宗案件、五宗暫未公開的姦殺案，以及大量性犯罪案件。
將專頁設定為「搶先看」/ "See first"，最新故仔馬上睇！
我屋企有隻熊貓：https://goo.gl/u3KwT3
你心口有本書：http://bit.do/e2Nwo
#短故 #短篇 #小說 #陳美濤 #廣東話 #粵語 #tomatochan #阿嫲被姦殺後
Search